Thursday, August 27, 2015

വെന്മേനാട് എസ്‌.പി.സി ഓണം ക്യാമ്പ്‌

വെന്മേനാട്:മത സൗഹാര്‍‌ദ്ധത്തിന്റേയും നന്മയുടെയും ഒരുമയുടെയും സന്ദേശം ഉയര്‍‌ത്തി എം.എ.എസ്‌.എം വിദ്യാലയത്തിലെ എസ്‌.പി.സി വിദ്യാര്‍‌ഥികള്‍‌ക്കായി മൂന്നു ദിവസം നീണ്ടു നിന്ന ഓണം ക്യാമ്പ്‌ നടത്തി.85 കേഡറ്റുകള്‍ പങ്കെടുത്ത ക്യാമ്പ്‌ ഗുരുവായൂര്‍ സര്‍‌ക്കിള്‍ ഇന്‍‌സ്‌പെക്‌ടര്‍ സി.ആര്‍ സന്തോഷ്‌ ഉദ്‌ഘാടനം ചെയ്‌തു.മാറുന്ന ലോകത്തെകുറിച്ചും,മദ്യത്തിന്റെയും മയക്ക്‌ മരുന്നിന്റെയും ദൂഷ്യഫലങ്ങളെകുറിച്ചും,സൈബര്‍ ലോകത്തെ ചതിക്കുഴികളെ കുറിച്ചുമുള്ള പാഠങ്ങള്‍ കേഡറ്റുകള്‍‌ക്ക്‌ നല്‍‌കി.ഓട്ടം,ഫിസിക്കല്‍ ട്രൈനിങ്,സെല്‍‌ഫ്‌ ഡിഫന്‍‌സ്‌,യോഗ എന്നിവയില്‍ പരിശീലനവും നല്‍‌കി.ഉന്നത പൊലീസുദ്യോഗസ്ഥരും,അദ്ധ്യാപകരും പഠനശിബിരങ്ങള്‍‌ക്ക്‌ നേതൃത്വം കൊടുത്തു.

പൂക്കള മത്സരം, കുതിരസവാരി,മാജിക്‌ഷോ എന്നിവയും ക്യാമ്പിന്റെ ഭാഗമായി സം‌ഘടിപ്പിക്കപ്പെട്ടു.

ത്രിദിന ഓണം ക്യാമ്പ്‌ പാവറട്ടി എസ്‌.ഐ അരുണ്‍,സീനിയര്‍ സിവില്‍ പൊലീസ്‌ ഓഫീസര്‍ ബിനു ഡേവീസ്‌,സിവില്‍ പൊലീസ്‌ ഓഫീസര്‍ പി.എസ്.സോഷി,വനിത സിവില്‍ പൊലീസ്‌ ഓഫീസര്‍ കെ.എം.സൗമ്യ,എം.എ.എസ്‌.എം വിദ്യാലയത്തിലെ എച്.എം ജിയൊ തോമസ്‌, എസ്‌.പി.സി അദ്ധ്യാപകരായ പിറ്റ്‌സണ്‍ ചാക്കൊ,കെ.കെ മായ എന്നിവരും നേതൃത്വം നല്‍‌കി.

Monday, August 24, 2015

ഓണാഘോഷപ്പൊലിമയില്‍

വെന്മേനാട്‌:എം.എ.എസ്‌.എം.വിദ്യാലയത്തിലെ ഹൈസ്‌ക്കൂള്‍ വിഭാഗം ഓണാഘോഷത്തോടനുബന്ധിച്ച് വൈവിധ്യമാര്‍‌ന്ന മത്സരപരിപാടികള്‍ സം‌ഘടിപ്പിച്ചു.മലയാളത്തിന്റെ പൈതൃക കലകളും സാം‌സ്‌കാരികത്തനിമ ചോര്‍‌ന്നു പോകാത്ത ഗൃഹാതുരത്വമുണര്‍‌ത്തുന്ന പഴയകാല ഗ്രാമീണ മത്സരങ്ങളും അരങ്ങേറി.പൂക്കളമത്സരങ്ങള്‍ വര്‍‌ണ്ണ വൈവിധ്യം കൊണ്ടും അധ്യാപക വിദ്യാര്‍‌ഥി വിദ്യാര്‍‌ഥിനികളുടെ പങ്കാളിത്തം കൊണ്ടും ശ്രദ്ധേയമായി.

Friday, August 21, 2015

അധ്യാപക രക്ഷാകര്‍തൃ സം‌ഗമം

വെന്മേനാട്‌:എം.എ.എസ്‌.എം വിദ്യാലയത്തില്‍ 2014/15 കാലത്തെ പി.ടി.എ പ്രവര്‍‌ത്തക സമിതിയുടെ അവലോകനയോഗം വൈസ്‌ പ്രസിഡണ്ട്‌ അസീസ്‌ മഞ്ഞിയിലിന്റെ അധ്യക്ഷതയില്‍ ചേര്‍‌ന്നു.സെക്രട്ടറിമാരായ വിദ്യാലയത്തിലെ വിവിധ വിഭാഗങ്ങളിലെ പ്രധാനാധ്യാപകര്‍ വി.എ.അബ്‌ദുല്‍ കരീം,കെ.അബ്‌ദുല്‍ റസാഖ്‌,ജിയോ തോമസ്‌ എന്നിവര്‍ അവതരിപ്പിച്ച റിപ്പോര്‍‌ട്ടിങ് സമിതി ചര്‍‌ച്ചചെയ്‌തു അം‌ഗീകരിച്ചു.വരവു ചെലവു കണക്കുകള്‍ ഓഡിറ്റിങ്ങിനു വിധേയമാക്കുമെന്ന ധാരണയോടെ പാസ്സാക്കി.

2015/16 വിദ്യാഭ്യാസവര്‍‌ഷത്തോടനുബന്ധിച്ച്‌ തെരഞ്ഞെടുക്കപ്പെട്ട അധ്യാപക രക്ഷകര്‍തൃ സമിതി പ്രതിനിധികളുടെ സാന്നിധ്യത്തില്‍ സെപ്‌തമ്പര്‍ 3 ന്‌ ജനറല്‍ബോഡി ചേരും. പ്രസ്‌തുത സം‌ഗമത്തില്‍ വെച്ച്‌ പുതിയ വിദ്യാഭ്യാസ വര്‍‌ഷത്തെ സാരഥിയെ തെരഞ്ഞെടുത്തുകൊണ്ട് പി.ടി.എ ഔദ്യോഗികമായി നിലവില്‍ വരുമെന്നു ജനറല്‍ സേകട്ടറി അറിയിച്ചു.വിദ്യാര്‍‌ഥികള്‍‌ക്കും രക്ഷിതാക്കള്‍‌ക്കും വേണ്ടി ബോധവത്കരണം,പുതിയ അധ്യയനവര്‍‌ഷത്തെ ആസൂത്രണങ്ങള്‍ എന്നിവ ജനറല്‍ബോഡി അജണ്ടയിലെ മുഖ്യ ഘടകമായിരിക്കും.

Monday, April 20, 2015

എം.എ. എസ്‌. എം നൂറുമേനി

വെന്മേനാട്‌: എം.എ. എസ്‌. എം വിദ്യാലയത്തില്‍ ഈ വര്‍ഷം പത്താം തരം പൊതു പരീക്ഷക്കിരുന്ന എല്ലാ വിദ്യാര്‍ഥികളും വിജയം കൈവരിച്ചിരിക്കുന്നു.ചരിത്ര പ്രസിദ്ധമായ ഈ നൂറുമേനി വിജയത്തില്‍ വിദ്യാലയാധികൃതരും അധ്യാപകരും രക്ഷാകര്‍ത്താക്കളും സന്തോഷം രേഖപ്പെടുത്തി.വെന്മേനാട്‌ എം.എ.എസ്‌.എം വിദ്യാലയത്തിന്‌ അമ്പതിന്റെ നിറവില്‍ ലഭിച്ച അഭിമാനാര്‍ഹമായ വിജയത്തില്‍ ആശംസകളുടെ പ്രവാഹമാണെന്ന്‌ റിപ്പോര്‍ട്ട്‌ ചെയ്യപ്പെടുന്നു.അധ്യാപക രക്ഷാകര്‍തൃ സമിതി,പോസ്റ്റ്‌ വന്മേനാട്‌,ഖത്തറിലെ പൂര്‍വവിദ്യാര്‍ഥി സംഘം തുടങ്ങിയവര്‍ അനുമോദനങ്ങള്‍ അറിയിച്ചു.

Tuesday, March 31, 2015

ശ്രീമതി ജസ്സിയ്‌ക്ക്‌ യാത്രയയപ്പ്‌ നല്‍കി

വെന്മേനാട്‌:എം.എ.എസ്‌.എം വിദ്യാലയത്തില്‍ സ്‌തുത്യര്‍ഹമായ സേവനം സമര്‍പ്പിച്ച ശ്രീമതി ജസ്സി ആന്‍റ്റോ അധ്യാപനകാലം വിജയകരമായി പൂര്‍ത്തീകരിച്ചു.വിദ്യാലയത്തിലെ ഔദ്യോഗികകാലത്തിനു വിരാമമിട്ട്‌ വിശ്രമ ജിവിതത്തിലേയ്‌ക്ക്‌ പ്രവേശിച്ച ശ്രീമതി ജസ്സിയ്‌ക്ക്‌ സഹ പ്രവര്‍ത്തകരും അധ്യാപിക അധ്യാപകരും ചേര്‍ന്നു സമുചിതമായ യാത്രയയപ്പ്‌ നല്‍കി.അധികൃതരുടേയും പ്രധാനാധ്യാപകരുടേയും  വിദ്യാര്‍ഥികളുടേയും രക്ഷകര്‍തൃ സമിതിയുടേയും സ്‌നേഹാദരങ്ങള്‍ ഏറ്റുവാങ്ങിയ അധ്യാപികയുടെ സേവനങ്ങള്‍ ഏറെ പ്രശംസിക്കപ്പെട്ടു.  

Saturday, March 28, 2015

വായനാ ലോകം

വെന്മേനാട്‌: എം.എ.എസ്‌.എം വിദ്യാലയത്തില്‍ വിശാലമായ ലൈബ്രറി ഒരുക്കാനുള്ള ശ്രമങ്ങള്‍ക്ക്‌ പ്രാരംഭം കുറിച്ചിരിക്കുന്നു.സാഹിത്യ ശാഖയിലെ കലയും ശാസ്‌ത്രവും കഥയും കവിതയും നോവലുകളും ചരിത്ര പുസ്‌തകങ്ങളും ലോകോത്തര ക്ളാസിക്കുകളും എല്ലാം ഉള്ള വിപുലമായ വായനാ ലോകം ഒരുക്കാനുള്ള തയാറെടുപ്പിലാണ്‌ വിദ്യാലയാധികൃതര്‍ .മഹത്തായ ഈ ഉദ്യമത്തെ എല്ലാ അര്‍ഥത്തിലും പ്രോത്സാഹിപ്പിക്കണമെന്ന്‌ പ്രധാനാധ്യാപകരും വിദ്യാലയവുമായി ബന്ധപ്പെട്ട സമിതികളും അഭ്യര്‍ഥിച്ചു. പ്രവാസികളായ പൂര്‍വ വിദ്യാര്‍ഥികള്‍ക്ക്‌ തങ്ങളുടെ ഭാഗധേയത്വം ഉറപ്പുവരുത്താന്‍ പിടിഎ വൈസ്‌ പ്രസിഡന്റ്‌ അസീസ്‌ മഞ്ഞിയിലുമായി ബന്ധപ്പെടാവുന്നതാണ്‌.  

Monday, March 16, 2015

വേനല്‍ കൂടാരം

വെന്മേനാട്‌ എം.എ.എസ്‌.എം വിദ്യാലയത്തിലെ ഹൈസ്‌ക്കൂള്‍ ക്ളാസ്സ്‌ വിദ്യാര്‍ഥികളുടെ ബുദ്ധിപരവും മാനസികവുമായ വെളിച്ചവും വളര്‍ച്ചയും ലക്ഷ്യം വെച്ചു കൊണ്ട്‌ 'വേനല്‍ കൂടാരം ഒരുക്കുന്നു' കളിയും ചിരിയും കാര്യവുമായി കുട്ടികള്‍ക്ക്‌ ഉല്ലസിക്കാനൊരു അവസരം.  മെയ്‌ നാലിന്‌ പത്തുമണിമുതല്‍ ആരംഭിക്കുന്ന പരിപാടിയില്‍ പ്രശസ്‌തര്‍ പങ്കെടുക്കുമെന്ന്‌ അധികൃതര്‍ അറിയിച്ചു.

Thursday, February 12, 2015

ലജ്ജ ഒരു സംസ്‌കാരമാണ്‌

ലജ്ജ ഒരു സംസ്‌കാരമാണ്‌.ലജ്ജയില്ലായ്‌മ മറ്റൊരു സംസ്‌കാരവും. മോഹിപ്പിക്കാനുള്ള തരളിത സങ്കല്‍‌പങ്ങളില്‍ പരിസരം മറന്നുല്ലസിക്കുന്നവരത്രെ ലജ്ജ കെട്ടവര്‍.ഈ വളയത്തില്‍ മുഖം കുത്തി വീഴുന്നവരത്രെ മനസ്സു കെട്ടവര്‍.ഉണ്ണുന്നതിലും ഉടുക്കുന്നതിലും വ്യക്തിയുടെ സംസ്‌കാരം പ്രതിഫലിക്കും. അരുതായ്‌മകളുടെ ചൂരലുകളല്ല.മാന്യമായ സംസ്‌കാരത്തെ അനുഭവേദ്യമാക്കാനുള്ള ക്രിയാത്മകമായ കര്‍മ്മ സരണികളാണ്‌ രൂപപ്പെടേണ്ടത്‌.ഒരു സമൂഹം നിഷ്‌കാസനം ചെയ്യപ്പെടാന്‍ പോകുന്നതിന്റെ സൂചനയായി ലജ്ജയില്ലാത്തവരുടെ പെരുപ്പത്തെ പ്രവചിക്കുന്നവരും ഉണ്ട്‌.

Tuesday, February 3, 2015

സമാപനസമ്മേളനം കൊടിയിറങ്ങി

വെന്മേനാട്‌:എം.എ.എസ്.എം വിദ്യാലയത്തിന്റെ സുവര്‍ണ്ണ ജൂബിലി സമാപന സമ്മേളനം  ആഘോഷകരവും ആവേശകരവുമായി സമാപിച്ചു.മണലൂര്‍ ജനപ്രതിനിധി ശ്രീ  പി.എ മാധവന്റെ അധ്യക്ഷതയില്‍ ചേര്‍ന്ന സമ്മേളനവും വിദ്യാഭ്യാസ വകുപ്പ്‌ ആസൂത്രണം ചെയ്‌ത കരുത്ത്‌ പദ്ധതിയുടെ സംസ്‌ഥാനതല പ്രാരംഭവും  ബഹു.വിദ്യാഭ്യാസ വകുപ്പ്‌ മന്ത്രി പി.കെ.അബ്‌ദു റബ്ബ്‌ ഉദ്‌ഘാടനം ചെയ്‌തു.ഗുരുവായുര്‍ ജനപ്രതിനിധി ശ്രീ കെ.വി അബ്‌ദുല്‍ ഖാദര്‍,മാനേജര്‍ എം.കെ മുഹമ്മദ്‌ ഹാജി,ശ്രി സി.എച്ച്‌ റഷീദ്‌,ശ്രി ഇ.പി ഖമറുദ്ധീന്‍ ,ശ്രീ  കെ .എന്‍ സതീഷ്‌ .ശ്രീ സി.കെ മോഹനന്‍ ഡോ.പി.എ സാജുദ്ധീന്‍ ,ശ്രീ ആര്‍.പി അബ്‌ദുല്‍ റഷീദ്‌,ശ്രീ പി.കെ.രാജന്‍,ശ്രീ.വി.കെ ഷാഹു ഹാജി,ശ്രീ ജെയ്‌ക്കബ്‌ ജോബ്‌ ഐ.എ.എസ്,ശ്രീ.കെ.ആര്‍ നസീബുല്ല, ശ്രീമതി ലീല കുഞ്ഞാപ്പു,ശ്രീ.എ.ടി ആന്റോ,ശ്രീ.എം.ടി തോമസ്‌,ശ്രീമതി വിമല സേതുമാധവന്‍,ശ്രീ ഇ ഫാസില്‍ ശ്രിമതി മായ,ശ്രീമതി ടി.ഡി അനിതമുമാരി,ശ്രീ ടി.എ ജോയ്‌,ശ്രീ പി.കെ അബ്‌ദുല്ലക്കുട്ടി,ശ്രീ അസ്‌ഗറലി തങ്ങള്‍ ,ശ്രി റഹ്‌മാന്‍ തിരുനെല്ലൂര്‍ അസീസ്‌ മഞ്ഞിയില്‍ തുടങ്ങിയ സാമൂഹിക സാംസ്‌കാരിക രാഷ്‌ട്രീയ രംഗത്തെ പ്രമുഖര്‍ സമ്മേളനത്തെ ധന്യമാക്കി.

തുടര്‍ച്ചയായി 50 വര്‍ഷം മാനേജറായ എം.കെ മുഹമ്മദ്‌ ഹാജിയെ മന്ത്രി ആദരിച്ചു.സ്‌ക്കൂള്‍ അഡ്‌മിനിസ്ട്രേറ്റര്‍ എം.കെ മുനീര്‍ മന്ത്രിയ്‌ക്ക്‌ ഉപഹാരം നല്‍കി.

വിദ്യാലയത്തിന്റെ യശസ്സുയര്‍ത്തിയ വിദ്യാര്‍ഥി വിദ്യാര്‍ഥിനികളെയും കലാകായിക പാഠ്യരംഗത്തെ പ്രശസ്ത സേവനം കാഴ്‌ചവെച്ചവരേയും പ്രത്യേകം പുരസ്‌കാരങ്ങള്‍ നല്‍കി ആദരിച്ചു.ഈ വര്‍ഷം വിരമിക്കുന്ന ശ്രീമതി ജെസി ആന്റോയെ പ്രത്യേകം ആദരിക്കുകയും അവരുടെ വിശ്രമ ജീവിതത്തിന്‌ ഭാവുകങ്ങള്‍ നേരുകയും ചെയ്‌തു .വിദ്യാലയത്തിലെ കലാപ്രതിഭകളുടേയും പൂര്‍വ വിദ്യാര്‍ഥികളുടേയും തെരഞ്ഞെടുക്കപ്പെട്ട കലാവിരുന്ന്‌ സദസ്സിനെ ഏറെ സന്തോഷിപ്പിച്ചു.

പ്രിസിപ്പാള്‍ വി.എം കരീം സ്വാഗതവും പി.ടി.എ പ്രസിഡന്റ്‌ വി.കെ അബ്‌ദുല്‍ ഫത്താഹ്‌ നന്ദിയും പറഞ്ഞു.

വിദ്യാലയത്തിലെ പ്രധാനാധ്യാപകര്‍ വി.എം  അബ്‌ദുല്‍ കരീം  ,കെ.അബ്‌ദുല്‍ റസാഖ്‌ , ജിയോ തോമസ്‌ എന്നിവരുടെ നേതൃത്വത്തിലെ അധ്യാപകരുടെ നിസ്വാര്‍ഥ സേവനം  പ്രശംസാര്‍ഹമായിരുന്നു. 

വെന്മേനാട്‌ സമാപന സമ്മേളനം ഇന്ന്‌

വെന്മേനാട്‌: എം.എ.എസ്‌.എം വിദ്യാലയത്തിന്റെ സുവര്‍ണ്ണ ജൂബിലി ആഘോഷങ്ങളുടെ സമാപന സമ്മേളനം ഫിബ്രുവരി 3 ന്‌ സാമൂഹിക സാംസ്‌കാരിക രാഷ്‌ട്രീയ രംഗത്തെ പ്രമുഖരുടെ സാന്നിധ്യം കൊണ്ട്‌ സമ്പന്നമാകും. പെണ്‍കുട്ടികള്‍ക്കായുള്ള വിദ്യാഭ്യാസവകുപ്പിന്റെ 'കരുത്ത്' പദ്ധതിയുടെ സംസ്ഥാനതല ഉദ്ഘാടനം വെന്മേനാട് എം.എസ്.എം.വൊക്കേഷണല്‍ ഹയര്‍ സെക്കന്‍ഡറി സ്‌കൂളില്‍ നടക്കും. ചൊവ്വാഴ്ച രാവിലെ പത്തിന് നടക്കുന്ന ചടങ്ങ് വിദ്യാഭ്യാസമന്ത്രി പി.കെ. അബ്‌ദുറബ്ബ്‌ ഉദ്ഘാടനം ചെയ്യും. സ്‌കൂളിന്റെ അമ്പതാം വാര്‍ഷികാഘോഷങ്ങളുടെ സമാപനസമ്മേളനവും ഇതോടൊപ്പം നടക്കും. ഡി.സി.എ. യൂണിറ്റ്, ഡോട്ട് പദ്ധതി, എന്‍.എസ്.എസ്. യൂണിറ്റ്, കരുത്ത് പദ്ധതി ഫണ്ടുവിതരണം, ഗൈഡ്‌സ് യൂണിറ്റ്, സ്മരണികപ്രകാശനം, തായ്ക്വണ്ട പരിശീലനം തുടങ്ങിയവയുടെ ഉദ്ഘാടനവും ചടങ്ങില്‍ നടക്കും. 

സാംസ്‌കാരിക സമ്മേളനം ,വിദ്യാര്‍ഥി വിദ്യാര്‍ഥിനികളൊരുക്കുന്ന കലാസാഹിത്യ വിരുന്ന്‌,പൂര്‍വ വിദ്യാര്‍ഥി അധ്യാപക കൂട്ടായ്‌മയായ പോസ്റ്റിന്റെ ഔദ്യോഗിക പ്രഖ്യാപനം. വിദ്യാലയത്തിന്റെ യശസ്സുയര്‍ത്തിയ വിദ്യാര്‍ഥികള്‍ക്കും പൂര്‍വ വിദ്യാര്‍ഥികള്‍ക്കുമുള്ള ആദരം തുടങ്ങിയ വൈവിധ്യമാര്‍ന്ന പരിപാടികള്‍ അരങ്ങേറുമെന്ന്‌ ബന്ധപ്പെട്ടവര്‍ അറിയിച്ചു.പ്രദേശത്തിന്റെ വിളക്കും വെളിച്ചവുമായ വിദ്യാലയത്തിന്റെ സുവര്‍ണ്ണ ജൂബിലി ആഘോങ്ങള്‍ വര്‍ണ്ണാഭമാക്കാന്‍ സഹൃദയരുടെ സഹകരണവും സാനിധ്യവും വേണമെന്ന്‌ അധികൃതര്‍ അഭ്യര്‍ഥിച്ചു.

പൂര്‍വ വിദ്യാര്‍ഥി അധ്യാപക സായഹ്നത്തിന്റെ ഭാഗമായി 'പോസ്റ്റ്' ചെയര്‍മാന്‍ ആര്‍.പി റഷീദ്‌ രക്ഷിതാക്കളെ അഭിസംബോധന ചെയ്യും. അസീസ്‌ മഞ്ഞിയില്‍ വര്‍ത്തമാനകാല സാമൂഹികാവസ്ഥയുടെ നേര്‍ക്കാഴ്‌ച ഭാരതം എന്ന കവിതയിലൂടെ അവതരിപ്പിക്കും . 

വാര്‍ഷികാഘോഷക്കമ്മിറ്റി ജനറല്‍ കണ്‍വീനര്‍ വി.എം. കരീം, ചെയര്‍മാന്‍ വി.കെ. അബ്ദുള്‍ഫത്താഹ് എന്നിവര്‍ പത്രസമ്മേളനത്തില്‍ പങ്കെടുത്തു.

Monday, February 2, 2015

അധ്യാപകന്റെ ദൌത്യം 

ഭാവി വാഗ്ദാനങ്ങളെ വാര്‍ത്തെടുക്കുന്ന ധര്‍മ്മ സരണിയിലെ വീരോചിതമായ കര്‍മ്മങ്ങള്‍ക്ക്‌ ചൂട്ട്‌ പിടിക്കാന്‍ നിയുക്തരായ പരിവ്രാചകന്മാരത്രെ അധ്യാപകര്‍ .കുശവന്റെ കയ്യിലെ കളിമണ്ണുരളകളെപ്പോലെ പുതിയ രൂപവും ഭാവവുമാകാന്‍ കാത്ത്‌ കഴിയുന്ന അസംസ്‌കൃത മണ്ണുരളകളാണ്‌ വിദ്യാര്‍ഥികള്‍. പാകപ്പെടുത്തപ്പെട്ട മണ്ണുരളകള്‍ കലങ്ങളായും കുടങ്ങളായും ചട്ടികളായും ചെരാതുകളായും മാറ്റപ്പെടുന്നു.അതതു രൂപ കല്‍പനക്കനുസൃതമായി മണ്ണ്‌ പാകപ്പെടുക എന്നതുപോലെ പാകപ്പെട്ടവിധം രൂപപ്പെടുത്താനും സാധിക്കണം.

വിദ്യാര്‍ഥികളെന്ന മണ്ണുരളകള്‍ പരുവപ്പെടേണ്ടത്‌ വരുടെ മാതാപിതാക്കളുടെ മടിത്തട്ടുകളിലാണ്‌.രൂപപ്പെടേണ്ടത്‌ അധ്യാപകന്റെ നിര്‍മ്മാണ കൌശലത്തിലും.മണ്ണ്‌ യഥാവിധി പാകപ്പെടുന്നില്ല എന്നത്‌ ദുരന്തമാണ്‌.യഥോചിതം രൂപപ്പെടുന്നില്ല എന്നതും .

സമൂഹത്തിന്റെ വിവിധമേഖലയിലുള്ളവരുടെ പോരായ്‌മകളും ദൂഷ്യങ്ങളും എടുത്തോതുന്ന വര്‍ത്തമാന ശൈലി പുനര്‍വിചിന്തനത്തിന്‌ വിധേയമാക്കണം.ആത്യന്തികമായി മാറേണ്ടത്‌ സമൂഹമാണ്‌ .നല്ല സമൂഹത്തില്‍ നല്ല അധ്യാപകരുണ്ടാകും .നല്ല ഉദ്യോഗസ്ഥരുണ്ടാക്കും .നല്ല രാഷ്‌ട്രിയക്കാരനും സാമുഹിക പ്രവര്‍ത്തകനും ഉണ്ടാകും .നല്ല അവസ്ഥയും വ്യവസ്ഥയും ഉണ്ടാകും.ഒരു നല്ല നാളെയുടെ സങ്കല്‍പത്തെ പൂവണിയിക്കുന്നതില്‍ നിതാന്ത ജാഗ്രതയുള്ളവരായിരിക്കണം മതാപിതാക്കളും അധ്യാപകരും.